बैंककबाट आउँदै गरेको जेजु एयरको विमान दक्षिण कोरियाको मुआन विमानस्थलमा आइतबार दुर्घटना भएको हो। समाचार एजेन्सी एपीका अनुसार विमानमा १७५ यात्रु र ६ चालक दलका सदस्यसहित १८१ जना सवार थिए। हालसम्म १२४ शव निकालिएको छ।

उद्धार टोलीले २ जनाको जीवितै उद्धार गरिएको जानकारी दिएको छ। बाँकी ५५ यात्रुको मृत्यु भएको आशंका गरिएको छ।

दुर्घटना स्थानीय समय ९:०७ मा भएको थियो। विमान मुआन अन्तर्राष्ट्रिय विमानस्थलमा अवतरण गर्न लागेको थियो। एकै समयमा ल्यान्डिङ गियरमा खराबी पत्ता लाग्यो। जसका कारण यसका पाङ्ग्राहरु खुलेर तल आएनन्।

पाङ्ग्रा नखुलेपछि विमानले आकस्मिक पेट अवतरण गरेको थियो। यसमा विमानको शरीर सिधै रनवेमा ठोक्किन्छ। यसै क्रममा विमान धावनमार्गमा चिप्लिएर विमानस्थलको बाउन्ड्री पर्खालमा ठोक्किएको थियो। विमान ठोक्किने बित्तिकै ठूलो विस्फोट भयो र त्यो आगोको गोलामा परिणत भयो।