काठमाडौँ। महाराष्ट्रको नान्देड जिल्लाको मुगाउँ टांडा गाउँका १०७ जना एकैपटक बिरामी परेका छन् । यस गाउँमा करिब ४ सय ४० मानिस बसोबास गर्छन्, जसले कुवाको पानी पिउन प्रयोग गर्छन् ।

पेट दुखेको गुनासो आएपछि सो गाउँका बासिन्दाको जाँच गर्दा सबैजना झाडापखालाबाट पीडित भएको पाइयो । अधिकांश बिरामीको गाउँमै उपचार भएको थियो भने ३७ जनालाई छिमेकी गाउँकै प्राथमिक अस्पतालमा लैजानुपरेको थियो । वर्षायाममा इनारको पानीमा संक्रमण हुने गरेको अनुसन्धानले देखाएको छ । संक्रमित पानी पखालाको कारण बन्यो ।

विश्व स्वास्थ्य संगठन (डब्लुएचओ) का अनुसार विश्वका सबै विकासोन्मुख देशहरूमा ८० प्रतिशत रोग पानीबाट हुने रोगहरू हुन् । विकासोन्मुख देशहरूमा कुल मृत्युको एक तिहाइ कारण जलजन्य रोगहरू हुन् ।

सङ्क्रमित पानी पिउँदा हैजा, झाडापखाला, टाइफाइडजस्ता रोगको जोखिम हुन्छ । तर वर्षाको दिनमा यो खतरा झनै बढ्छ ।