काठमाडौँ। पाकिस्तानको खैबर पख्तुनख्वाको कुर्रम जिल्लामा शिया र सुन्नी समुदायबीचको जग्गा विवादमा ४९ जनाको मृत्यु भएको छ। यसबाहेक दुई सयभन्दा बढी घाइते भएका छन्।

यो विवादको जरा ३० एकड जग्गा हो। कुर्रम जिल्लाको बुसेहरा गाउँमा दुई जातिबीच स्वामित्वको हकलाई लिएर विवाद भएको छ।

बीबीसी रिपोर्टका अनुसार गत हप्ता बुधबार दुई परिवारबीच सुरु भएको यो झगडा छिट्टै दुई जनजातिबीच फैलियो। अहिले यस विषयमा जिल्लाभर तनाव छ।

पाकिस्तानी टिभी च्यानल साम न्युजका अनुसार सुन्नी समुदायलाई सीमापार अफगान जनजातिहरूबाट समर्थन मिलिरहेको छ, जसका कारण उनीहरू त्रसित भइरहेका छन्।

दुई परिवारबीच सुरु भएको झगडा जिल्लाभर फैलियो 

कुर्रमका डेपुटी कमिश्नर जावेदुल्लाह मेसुदले स्थानीय सञ्चारमाध्यमलाई दुई समुदायबीच ६ दिनदेखि झडप जारी रहेको बताए। उनले अधिकारीसँग मिलेर आदिवासी जनजाति जिर्गाका अगुवा र अन्यको सहयोगमा दुई समुदायबीच सम्झौता गराए पनि जिल्लाका अन्य भागमा भने गोली चलेको खबर छ।

स्थानीय प्रहरी अधिकारी मुर्तजा हुसेनले पाकिस्तानी अखबार डनलाई भने कि सन् २००७ मा सुन्नी मिड्घी र शिया मलिखेल समुदायबीच विवाद सुरु भएको थियो। त्यतिबेला पनि हिंसाका घटनाहरु भएका थिए। गत वर्ष जुलाईमा पनि विवाद भएको थियो, त्यसपछि शिया र सुन्नी समुदायबीच झगडा भएको थियो। यसमा धेरैको ज्यान गयो।

गत वर्ष समाप्त भएको विवाद फेरि सुरु

गत वर्ष दुई पक्षबीचको झडप रोकिएपछि उनीहरुबीच सहमति भएको थियो। कसको जग्गा हो भन्ने निर्णय सरकारले गर्ने निर्णय भयो। जग्गा विवाद समाधान गर्ने भूमि आयोगको नियम दुवै पक्षले पालना गर्नुपर्नेछ।

यसपछि आयोगले आफ्नो निर्णय गर्दै यो जग्गा शिया समुदायलाई दिएको थियो तर एक वर्षपछि फेरि विवाद सुरु भयो। बुधबार जग्गा विवादको चर्चा चलिरहँदा एक व्यक्तिले गोली चलाएको हो। त्यसपछि दुई समुदायबीच रक्तपातपूर्ण द्वन्द्व सुरु भयो।