काठमाडौँ। केरलाको वायनाडमा जुलाई २९ मा भारी वर्षापछि आएको पहिरोमा परी अहिलेसम्म ३६५ जनाको मृत्यु भएको छ। दुर्घटनापछि २०६ जना अझै बेपत्ता छन्। अहिले साउथ स्टार चिरञ्जीवी र रामचरणले पनि केरलाको मुख्यमन्त्री राहत कोषमा पीडितलाई सहयोग गरेका छन्। उनले पीडितलाई १ करोड रुपैयाँ आर्थिक सहयोग गरेका छन्।

चिरञ्जीवीले हालै आफ्नो सामाजिक सञ्जालमा लेखेका छन् वायनाड त्रासदीका पीडितहरूप्रति मेरो समवेदना। रामचरण र मैले मिलेर केरलाको मुख्यमन्त्री राहत कोषमा पीडितहरूलाई सहयोग गर्न १ करोड रुपैयाँ दिने निर्णय गरेका छौं। मेरो प्रार्थना पीडामा बाँचिरहेका सबै पीडितहरूसँग छ।

उद्धार टोलीलाई सहयोग गर्न अभिनेता मोहनलाल पुगेका छन्। दक्षिणी अभिनेता तथा केरलाको १२२ टेरिटोरियल आर्मीका लेफ्टिनेन्ट कर्णेल मोहनलालले उद्धारमा संलग्न सेनालाई भेटेका छन्। उनले पहिरो प्रभावित क्षेत्रको भ्रमण गरेका छन्। वर्दीमा आएका मोहनलालले पीडितका लागि तीन करोड रुपैयाँ सहयोग घोषणा गरेका छन्।

साउथका यी स्टारले पनि पीडितलाई आर्थिक सहयोग गरेका छन्। अभिनेत्री ज्योतिका, कार्ती र सूर्याले ५० लाख रुपैयाँ आर्थिक सहयोग गरेका छन्। रश्मिका मन्डन्नाले १० लाख रुपैयाँ दान गरेकी छन्। मलयालम अभिनेता फहद फासिलले पीडितलाई २५ लाख रुपैयाँ सहयोग गरेका छन्। प्रेस विज्ञप्तिमार्फत जानकारी दिँदै उनले पहिरो पीडितलाई सहयोग गर्न मुख्यमन्त्री राहत कोषमा २५ लाख रुपैयाँ सहयोग गरेको बताए। यस दु:खद घडीमा हामी यस विपद्सँग लडिरहेका जनताको साथमा छौँ। हामी मिलेर यो समस्याको सामना गर्नेछौं।

फहद बाहेक ‘पोन्नियान सेल्वन पार्ट १’ र ‘रावण’ जस्ता फिल्ममा काम गरिसकेका तमिल स्टार विक्रमले २० लाख रुपैयाँ दान गरेका छन्। मलयालम अभिनेता मामुट्टी र उनका छोरा दुल्कर सलमानले राहत कोषमा ३५ लाख रुपैयाँ सहयोग गरेका छन्। यसबारेमा पत्रकारसँग कुरा गर्दै मामुट्टीले राहत कोषमा आफूले थोरै रकम सहयोग गरेको बताए। मिडिया रिपोर्टहरूका अनुसार मामुट्टीको च्यारिटेबल ट्रस्टले पीडितहरूलाई मद्दत गर्न र उनीहरूलाई आवश्यक दैनिक आवश्यकताहरू उपलब्ध गराउन पनि काम गरिरहेको छ। जसमा खाद्यवस्तु, औषधि, लत्ताकपडा समावेश छ।